Даламның сен бір дастаны

Алқынып жеткен алдан күн,
Алауын жағар арманның,
Опасыз мынау дүние
Жұмбағы көп-ау жалғанның.
Сырына толық қанбастан,
Ләззатын тұтас алмастан,
Үзіліп түсер қысқа жіп,
Аяқсыз қалып ән-дастан.
Таусылдық кейде текке біз,
Таптырмас алыс кеткен із.
Шағала үні шарықтап,
Толқыған сезім – көк теңіз.
Үнінің ашық, асқағы,
Тамсантып қойған басқаны.
Мұң менен шерден жаралған
Даламның сен бір дастаны.
Толқынын тіліп боранның,
Жыл құсыменен оралдың.
Тоғайың болып тосып тұр
Тобылғы өңдес торанғың.
Алқынып жеткен алдан күн,
Алауын жағар арманның.
Сиқырлы мынау дүние,
Жұмбағы көп-ау жалғанның.