Дүние жалған – Жамау Бұхарбаев

Даңғыл жолдың бүлінгенін
Дару қылар шоқырақтар.
Ақылдының сүрінгенін
Армандайды ақымақтар
Биік ағаш құлап тынса,
Бұта бұтын көтереді.
Бейшара бұлт жылап тұрса
Жер қуанар бетегелі.
Опасыздың арам-асы,
Орға жығу ойлағаны.
Тұлпарлардың жаназасы
Тұғырларға той болады.
Жасарады кәрі байғыз,
Жақпар тастың қалқасында.
Періштені танымаймыз,
Перілердің арқасында.
Серті қандай сырдаң қудың,
Қорасанға қой шалады.
Бұралаңы мына өмірдің
Басқа түрлі ой салады.