Бір адамды алдарсың – Кәкімбек Салықов

Бір адамды алдарсың,
Ондайды кім аңғарсын?
Көпті алдауға жаттықсаң,
Киесі соғып зарларсың.
Бір аңқауды жығарсың,
Мықтымсып төрге шығарсың.
Жақтырмас бірақ көпшілік,
Жамбасқа түсіп құларсың.
Пыш-пышқа көмей созарсың,
Жел сөзге мініп озарсың.
Бірақ та шындық шырылдап,
Соңыңнан қалмай тозарсың.
Алпауыт етер байлығың,
Ақшамен өсер айбының.
Ел байлығын енші етсең,
Тозағы жұтар қайғының.
Адалдық – мәңгі мереке,
Ете алмас ешкім келеке,
Оралса адал теріңмен
Абырой, атақ, береке.

29.03.2012.
Астана