Кірпігін іледі мақпал түн....

Біз үшін жаз жайып жапырақ,
Сылдырап ағады бұлақтар.
Сәнденіп құлпырса атырап,
Тамсана қараймыз шуаққа әр.
Көктем де енеді көркіне,
Келтіріп ғаламның мақтауын.
Сезімді қоймастан еркіне,
Біз үшін жауады ақ жауын.
Еркіне бағынбай уақыттың,
Қыстың да әуені шырқалар.
Біз үшін бірі боп бақыттың,
Түседі қалықтап ұлпа қар.
Алаулап, жалындап, өртеніп,
Күн шығар еркелей, жасқанбай.
Көк жүзін жұлдызбен көмкеріп,
Қалқиды біз үшін аспанда Ай.
Атады күлімдеп, тағы да,
Таңдарға ілініп шуағы.
Көңілдің көрініп бағына,
Шолпан да біз үшін туады.
Дүр кілем айшықтап төзіммен,
Қырларды біз үшін жапқан гүл.
Жаныма жап-жақын сезіммен,
Кірпігін іледі мақпал түн.

---