Жер бетінің ерекше сүй аспанын – Айгүл Қадыр

Даналықтың сен де жаз бір дастанын,
Жер бетінің ерекше сүй аспанын.
Айналаңа қара да жақсы іс көр,
Жалғаныңда керегі жоқ басқаның.

Ләззатын сез өмірдің тыныс ала,
Тіршілікте бітпейтін жұмыс қана.
Сөйлей қалсаң әрдайым жақсы сөз айт,
Жақсы сөзде әр айтқан ырыс тола.

Алып тастап бойыңнан артық мұңды,
Тоқтата тұр бір сәтке аптығыңды.
Сурет салсаң бақыттың суретін сал,
Қылқаламың тербесін шаттығыңды.

Жақсылықты сіңірсін сезім, сана,
Ғұмыр кешу керек-ақ мейір қана.
Роман жазсаң бақытты дәріптеп жаз,
Өміріңнің авторы өзің ғана.
Айгүл Қадыр