Менің таңым атады алдан күліп! – Айгүл Қадыр

Сарқылмаған санамда сары үміт,
Үміттің де кей кезде жары күдік.
Өткен күндер артында із қалдырар.
Ертеңгі күн жасырар барын бүгіп.

Айдан арман, іздеймін күннен көрік,
Өмір жайлы жыр жазам түннен теріп.
Әрбір жұтым ауаны қастерлеймін,
Тым жетіліп кеткем жоқ желден жеріп.

Тұлғасына бақыттың нұры біткен,
Мақсатым көп ауырлау құны жүктен.
Сол мақсат пен арманға жетсем деймін,
Тек мен емес жан көп қой мұны күткен.

Теңізінде жүзбес ем алғыр мұңның,
Сыздамаса тамыры балтырымның.
Тиесілі бағымды алсам деймін,
Таусылмастан талқаны тағдырымның.

Түндігімді күн шықпай алғам түріп,
Бір үмітке бір үміт жалғап тұрып.
Бар бақытты сыйдырам құшағыма,
Менің таңым атады алдан күліп!
Айгүл Әбдіқадырқызы Анашбекова