Сезімнің сырын тыңдатып – Айгүл Қадыр

Сыбырлап қана сөйлейін,
Сезімнің сырын тыңдатып.
Жүрекке үнім жеткенде,
Дегізіп: "Осы шын бақыт!"

Құлпырып сосын жайнайын,
Көркіме көктем жарасып.
Өзіңе ғана қарасын,
Көздегі мөлдір қарашық.

Бұза алмай шырқын көңілдің.
Сіркіреп жауын басталсын.
Біз жайлы осы көктемде,
Жазылсын керім дастан шын.

Қазбауыр бұлтты қалқытып,
Жер бетін жауын аршысын.
Жып-жылы деммен жылытам,
Елемей сәуір тамшысын.

Баса алмай демін ентігіп,
Самал жел есіп туласын.
Махаббат деген осы деп,
Жапырақ біткен шуласын.
Айгүл Қадыр