Зайсан - аңыз

Зайсанның бүгін өткені
Айналып кетті аңызға.
Сайханның бағзы бөктері
Тамылжып тұрар тамызда.

Биіктік көрем Сауырдан,
Көлеңке жақтың қалқасы.
Аман қап жүрмін дауылдан -
Айбатты таудың арқасы.

Жайлауы байтақ Маңырақ
Жазында жасын ойнаған.
Төрт түлік төлі жамырап,
Сақманшы тойын тойлаған.

Алыстап кеттім ауылдан,
Арманның іздеп ақ таңын.
Жасара берер жауыннан -
Жарықтық, жасыл бақтарым.

Өткізген ыстық шақтарым -
Көктемің, күзің, қысың да!
Туған жер, сенсің мақтаным -
Көгерер көздің ұшында!

---