Айтыс (қыз сөзі)

                  Айтыс (қыз сөзі)
                 (тапсырыспен жазылған)
Сәлем бердім ұстаздар,​ сыныптастар,
Жеті оқитын замандас, беу-құрдастар!
«Сөздің басы сәлем» - деп бабам айтқан,
Бармысыңдар қарсылас,​ құрбы-достар?!

..... қызы .....мін ....... тегі,
Алматы — туып-өскен құт мекенім!
Жетінші «ә»-нің намысын қорғайтұғын,
Тілінің тікені бар айтыскермін!

Келіпсің айтысуға ..... құрдас,
Жігітке ұяң мінез еш жараспас?!
Біржан сал,  Жамбыл,  Кенен,  Ринаттай,
Сөзбенен мықты болсаң жең қарсылас.

Айтыс бұл — бабалардан мұра болған,
Кез-келсе қазақ сөзді сұрап алған.
Қанымда қайнап тұрған отты өлең бар,
Абайла,  орақ тілмен турап алам!

Біздің сынып игерген сан өнерді
Жетекшіміз ....... апай өнегелі.
Әнші,​ күйші,​ спортшы, биші де бар,
Сегіз қырлы, бір сырлы кілең сері.

Мен «айтысам» дегелі тыным таппай,
Барлығы тілеп жатыр ақ тілеуді.
Тілекші достарымның ниетіне,
Жеңуге ниеттімін бас жүлдені!

Қысқаша айтар болсам 7 «ә» жайлы,
Сынып бұл жақсы оқитын,  жанға жайлы.
Ұстаздар қатты мақтап кетпесе де,
Талант көп өзгелерге ұқсамайтын.

Біздермен қатарласқан егіз сынып,
Әзілмен өлең айттым өзімсініп.
....... құрдасыма сөз берейін,
Сөз алсын ұзын бойлы,  сері жігіт!

Айтыстың тақырыбы — «Тәуелсіздік»,
Ел басынан күн өткен небір сұмдық.
Тарихи ақтаңдақтар артта қалып,
Қазағым жасай берсін ақ күн туып.

Десе де ұмытпаймыз батырларды,
Ел үшін отқа түскен,  қаһарманды.
Арғысы — Күлтегін мен Тоныкөктер,
Бергісі — Қайрат,  Ербол,  Ләззаттарды.

Ортада айтулы көп зиялылар,
Абай,  Ыбырай, Шоқан мен Шәкәрім бар.
Әлихан Бөкейхандай көшбасшыға,
Ере алған Ахмет,  Мағжан,  Міржақыптар.

Әлімхан атамыз бар шекараны,
Лениннен даулап алған ойы орамды.
Әрқайсы бес-алты тіл жетік білген,
Қазақтың қорқытқан ғой қаймақтары.

Ахмет атамыздың қазақ тілі,
Әдебиет танытқышы,  әліпбиі.
Ғасыр өтіп кетсе де бізге азық боп,
Мәңгіге мұра болған бабам сыйы!

Сол тілді жаргондармен былғап сөйлеп,
Арго,  сленг сөздерін жинап сөйлеп.
Калькалап,  қате аударып,  үзіп-жұлып,
Жүргендер «Ана тілді» қалай сүймек?!

Жаргонмен түсінікті болса егер,
Че там братва,  базар нет,  мен спикер.
Батлда бомбить етем, гамать етем,
Рили айтам,  емеспін токсик, хейтер!

Осымен доғарайын жыр шумағын,
Көп сөйлеп кетірмейін сөздің дәмін.
Жеті «ә» мен жетінші «а» аман болса,
Көрерсіз әлі талай айтыстарын.