Әдемі – Ақылбек Шаяхмет

Күн сәулесі төгілгені әдемі,
Кемпірқосақ керілгені әдемі.
Көк шалғынға асыр салып жүргенде,
Көк көбелек көрінгені әдемі.

Жас шыбықтың бүр ашқаны әдемі,
Алма ағаштың гүл ашқаны әдемі.
Қариялар жол үстінде кездесіп,
Амандықты сұрасқаны әдемі.

Бұлбұл құстың сайрағаны әдемі,
Қозы-лақтың ойнағаны әдемі.
Ақ боз атын ерттеп мінген атамның
Қойды өріске айдағаны әдемі.

Ақ бөбектің үлкен көзі әдемі,
Әжеміздің күлген көзі әдемі.
Бәрінен де жасқа толған бөбектің
Тәй-тәй басып жүрген кезі әдемі.