Өтірік өлеңдер

Мың жыл бұрын табысқан тәтемменен,
Сексен жастай кіші екен әкем менен.
Жердің бетін қаптаған топан суды,
Тасып төктім аспанға катөлменен.
* * *
Қанатына отырып инеліктің,
Түскі асыма елудей ине жұттым.
Он сегіз мың ғаламның мамандығын,
Жөргегімде жатқанда үйреніппін.
* * *
Көк өгізім бұзаулап жетпісінде,
Он бұзауы туылмай кетті ішінде.
Отыз қасқыр зорығып өлген екен,
Ақ қоянның шыдамай тепкісіне.
* * *
Алты қабат аспанның ар жағында,
Алып кит ілінді қармағыма.
Алпыс аю алты жыл таласыпты.
Қолындағы әжемнің оймағына.
* * *
Тоқсан жылдай мінген кер дөненім,
Айлық жолда көрмедім терлегенін.
Мың жыл бұрын аспанның жұлдыздарын,
Етегіме тезекше терген едім.
* * *
Тайқазандай құйрығы көк ешкінің,
Көк ешкінің жан сырын көп естідім.
Өсек тасып, от жағып, жаныстырып,
Тау мен тауды өзара егестірдім.
* * *
Жүгімді артып он тонна есегіме,
Көк шыбынға ер салдым көшерімде.
Ет пен майды, астықты үйіп тастап,
Алты жылдай аш жаттым төсегімде.
* * *
Топырақпен сүрттім де көз жасымды,
Өзім кесіп тастадым өз басымды.
Мың шақырым жарысқа дайындалдым,
Жұттым-дағы он кило қорғасынды.
* * *
Теңіздердің бетіне ектім егін,
Кірпігімнің ұшымен көк тіредім.
Аспан құлап, басыма іс түскенде,
Күнге шығып, сол жерде көп түнедім.
* * *
Шықтыдағы мінбеге қара қарға,
Сабақ өтті оқушы балаларға.
Бір қаланы көшірдім жалғыз өзім,
Екі бөліп арттым да қара нарға.
* * *
Мініп алып илеусіз елтіріге,
Қас қаққанша жетіппін жер түбіне.
Тоқсан жылда әрең барып бір қайтты,
Елудегі құдашам төркініне.
* * *
Міндім-дағы жаратып бір шыбықты,
Бастап кеттім бақида тіршілікті.
Бір ғасырда оралсам пәниіме,
Кешке жақын батыстан күн шығыпты.
* * *
Ұстап алып кесіртке,
Құлағына ен салдым.
Аспанға айдап есекті,
Ұшқанына тамсандым.
* * *
Жараттым да қоңызды,
Қостым ұзақ жарысқа.
Оқыттым да доңызды,
Аттандырдым марсқа.
* * *
Алып бердім қыздарға,
Құмырсқаның асығын.
Бүрге шығып мұз – қарға,
Тапты сүйген ғашығын.
* * *
Қандаланың сирағын,
Елу ғасыр жинадым.
Көк шыбынның терісін,
Достарыма қимадым.
* * *
Ортасына тақтаның,
Шіркей бағып, баптадым.
Шаншып алып істікке,
Тірі аюды қақтадым.
* * *
Кесіп тастап басымды,
Төктім көлдей жасымды.
Қапаздағы торғайым,
Ұстап жейді лашынды.
* * *
Іркіт пісіп табаға,
Нан пісірдім сабаға.
Таңда шығып қоңызбен,
Айға бардым қонаға.
* * *
Ұясынан түлкінің,
Көк тіреді кірпігің.
Садақ, жебе жасадым,
Мүйізінен кірпінің.