Балқантаудың бауырында

Сен Балқанда, мен мұнда ара қашық,
Сағынышым күн сайын барады асып.
Мақпал кештер қалыпты тым алыста,
Сағым қуған жылдармен араласып.
Мен кеткенде Балқанда көктем еді,
Бел-белестер құлпырып көктеп еді.
Жадыратқан жанымды лебіңдей боп,
Жібек желі Арқаның өпкен еді.
Балқантаудың бауырына ұзап барып,
Қос көңілден жүруші ек сыр ақтарып.
Асыл еркем, өткеннің белгісіндей,
Жүрегімде қалыпты шырақ жанып.