Науырзым қорығында

Науырзымның қорығы,
Құстың құтты орыны.
Әупілдектің жаңғырып
Шығып жатыр зор үні.
Тырна жүрсе жағада,
Шабақ аулап шағала,
Ұшып жатыр қиқулап
Шүрегейлер көкала.
Айдын төсі жарқылдап,
Үйрек-қаздар қаңқылдап,
Жан-жағымнан құс үні
Естіледі саңқылдап.
Қамыс, қоға сыбдырлап,
Бозторғайлар шырылдап,
Көктем ерте келді деп
Бақа жатыр құрылдап.
Көл маңайы, аймағы
Қонған құстың ойнағы.
Бұзылмаған жер осы
Табиғаттың қаймағы.