Эшелондар

Соғыс кезі... Эшелондар тізбегі
Қайшы алысты шойын жолда түздегі.
Эшелондар жалғап тыл мен майданды,
Әскерлер мен ел үмітін үзбеді.
Шешу үшін өлім - өмір арасын
Жеткізетін қарудың не жаңасын,
Эшелондар дәнекер боп ортада,
«Тілдестірді» баласы мен анасын.
Дей алмаймыз, тамұқ таңы аз атты,
«Мессершмидт»* төндіргенде тозақты,
Эшелондар жауын құрттай жан таппай,
Жаралымен бірге тартты азапты.
Салмағына жаншылса да жер үсті,
Ауырсына үнсіз ғана келісті.
Күн-түн демей ерсілі-қарсылы ағылған
Эшелондар жақындатты Жеңісті.
Көріп көзбен рейхстагты алғанды,
Жиып енді барлық тірі қалғанды,
Мамыр айдай арқа-жарқа шуақ боп,
Эшелондар қауыштырды жарларды.
Талайларын талқан қылған турап от,
Сан боздақты қиып түскен бір-ақ оқ...
Эшелондар кеткен тарих қойнына
Қала берсін мұражайда мұра боп.

*Жау ұшағы