Түйін

(сөз соңы)

Саясатшыл жендеті
Зиялымды жау жасап,
Отыз жеті нәубеті
Өтті осылай қанқасап.
Өттік аман, кәззаптық
Қуғын-сүргін, аштықтан.
Жетті міне, Азаттық!
Атты міне, ақтық таң!
Осы – сенің жеңісің!
Осы – сенің жыр-әнің!
Тәуелсіздік жемісін
Қастерлеп өт, ұланым!
«Алаш!» – пірің, ұраның.
Қазақстан – ұлы әнің!
Жайнай берсін, лайым
Атамекен тұрағың!
Қолдап, қорғап Құдайым,
Желкілдеп өс, шырағым!