Әжем болғым келеді

Ақ жаулығын сәндеп ап,
Берер бізге ән де сап,
Әжем менің бал бармақ
Аспазшы да әмбебап.
Кітабын да оқиды,
Шұлығын да тоқиды.
Әлдиімен ұйықтатар
Құйтақандай Сақиды.
Киім-кешек, бұйым да,
Әжемізге бұйым ба?
Тігеді өзі төгілтіп,
Айналдырмай қиынға.
Ертектердің қандайын
Айт десең де, ол дайын.
Сәл қолғабыс тигізсең,
«Таудай бол!» – дер әрдайым.
Өз тәлімі – сенері,
Әрбір ісі – келелі,
Өнер тамған қолынан
Әжем болғым келеді.