Бұл қай баға?

Сауал:
Ешкі құйрық, айғыр жал,
Құдды санның керігі.
Жігерінен айрылған
Дымбілместің серігі.
Білім десе, жалынсыз
Жалқауларды ұнатар,
Сүйкімі жоқ, қадірсіз,
Бұл бағаны кім атар?

Жауап:
Қамданбасаң ертеден,
Күнделікке бекініп,
Мініп алар желкеге,
Бұл – ұсқынсыз екілік.

Сауал:
Екі-ақ әріп құрамым,
Белортада тұрағым.
Қалдырмаймын сыныпта
Болмасам да пырағың.
Қай бағамын, шырағым?

Жауап:
Әріпке ұқсас түрменен
Асығуды білмеген.
Үш де болса, күш болған
Орта баға бұл деген.

Сауал:
Үш әріп Т-ға қосылса,
Бағаң болар нарқы бар.
Басқы әріпсіз оқылса,
Тілсіз жау боп шарпылар.

Мұғалім:
Бұл қай баға, балалар,
Қайсың барсың шамалар?

Жауап:
Т бастаған бағамыз –
Төрт болғанда нарқы бар,
Басқы әріпсіз, қараңыз,
Өрт шықпай ма шарпылар.

Сауал:
Б бастаса кемемді
Ең бір үздік бағаңмын.
Басқы әріпсіз мен енді
Ақылың боп саналдым.

Жауап:
Ақылыңмын, бағаңмын
Деп тұрған соң өздері,
Шешуі бұл сауалдың
Бес және ес сөздері.