Есептеуге кім жүйрік

Бір ағашта – бес қарға,
Бір ағашта – үш қарға.
Жанындағы жас талға
Және қонды үш қарға.
Соныменен барлығы
Қанша болды, тұспалда.
* * *
Бір бұтақта жеті алма,
Бір бұтақта екі алма.
Бірін өзің жеп ал да,
Біреуін бер Кемалға.
Қалды сонда неше алма?
Шығара алмай осыны
Бұл есептен екі алма.
* * *
Бір ағашта он бұтақ.
Он бұтаққа бір топ құс
Ұшып келіп қонды тақ.
Ағаштағы құс саны
Қане, қанша болды, тап.
* * *
Тоғыз қоян,
Он екі тауықтың
Аяғы қанша?
Береді тауып кім?
Ал құлақ пен құйрығын
Бар ма есептер жүйрігің?
* * *
Көшербайдың бір жастағы
Көлкектеген бұл баспағы
Егінжайға жөнеп кетті.
Соңына ертіп сұр қасқаны,
Дайрабайдың қос танасын,
Момынбайдың қос қарасын.
Ұзын саны болды қанша?
Қане, алғыр, дос, санашы.