Матэ залка – Сырбай Мәуленов

Таңғы Мадрид жанып жатыр,
Түскі Мадрид жанып жатыр,
Кешкі Мадрид жанып жатыр,
Түнгі Мадрид жанып жатыр.
Қара түтінді қара аспан
Құж-құж тастай
Құлайды опырылып,
Жерде көкте
Соғыстың азынайды оты ұлып .
Интернационалдық бригада
От кешіп келеді алда .
Испания емес Венгрия
Мадрид емес Будапешт
Жанып жатқандай көрінеді генералға,
Оның сөзі қысқа,
Сол тұста:
Солдаттың адымындай ,
Барабан дабылындай,
Ракета жарығындай ,
Оқтардың адымындай .
Ол әр окопта
Солдаттармен жанады отта.
Жоқ бір кездегі
Мінездері.
Ол қазір
Құйылған құрыштардай,
Оқтармен бір ұшқандай,
Қынаптап суырылған қылыштардай,
Ол тірліктің тартады ұлы арнасын,
Жазады өзінің шығармасын:
Пулемет оқтарымен,
Граната оттарымен,
Кек қанымен,
Пиренейдің торала көзді толқынымен,
Солдат ошағының шоқтарымен....
Өтті жылдар
Баррикада түтінімен,
«Рот-фронт»
Дабылды от үнімен
Жатыр генерал
Испания жерін жайлап,
Желбірейді гүлдер
Қабірінде тудай жайнап
Испания аспаны
Мадияр аспанындай
Күркіреп өтеді күн
Генералдың жалын кешкен баяғы
жас шағындай.