Дала ауасы – Cырбай Мәуленов

Тербеледі толқындай жер көгеріп,
Машиналар тоқтайды көлге келіп,
Көл бетінде жатады байтақ аспан
Бауырына бұлтын ап дөңгеленіп.
Дала, дала... жаныңа жақын бәрі,
Келе жатса бұлт қайнап атылғалы.
Шақырады жанына ақ қайыңдар,
Ақ қайыңдар — даланың шатырлары.
Дала ауасы, даланың дарқан белі,
Дала тауы, даланың жалтаң көлі.
Әр уақытта жаныма сая болып,
Дауылдардан қорғайтын қалқан мені.
Бұл даланың әтірі — гүлі тұрмақ
Жусанын да иіскеймін үгітіп ап.
Топ-топ өскен тобылғы арасында,
Торғайдың да жатамын үнін тыңдап.
Өзендері жайылып екі бетке,
Ұлан дала жалғасқан шеті көкке.
Дала желі дуылдап қанымда ойнап,
Дала ауасы тулайды көкіректе.