Аспан да жалғыз болмайды екен – Ерлан Ахмет

Аспан да жалғыз болмайды екен –
төсінде бұлттар аунайды екен.
Жүректі сезім толғайды бөтен,
көңілді ойлар жаулайды секем.

Сарсаңға түсіп, сабасын баққан,
санаға таңба-тағасын таққан.
Құдайдан ғана жарасым тапқан –
жалғыздық кімнің жарасын жапқан?

Адалдық әркез аяусыз болар,
шындық та ащы сұраусыз қалар.
Сұлулық нағыз – бояусыз жандар,
сүйгенін іздеп, күмәнсіз табар.

Асқар да асқақ тауына қарап,
бақшасы менен бауын аралап.
Тіледім жырдың бауырға балап,
досына сыңар – жауына да бақ.

Аққулар қияр некені көлде,
жауқазын гүлдер мекені – белде.
Шаттығым сыйлап жетемін елге,
көктеммен егіз екенмін мен де.