Мен оралам! – Ринат Әбдіқалық

Жайық, әсем көзіңнен, кең қаладан,
Ғайып болып, әзірге, мен жоғалам.
Бірақ, бәрі...
Барлығы өзгергесін.
Сынақтағы сұрақ боп мен оралам.

Мен оралам,
Мені ойлап жатпасаңда,
Бақытыңды тапсаң да таппасаң да.
Алып - ұшып жүрсің-ау қарсы алардай,
Идеалды өмірдің қақпасы алда.

Мен оралам,
Батуға көздеріңде,
Әлде, мен де сол кезде өзгерем де,
Бақыттың байталына мініп келем,
Елемеймін, ілмеймін көзге мүлде.

Мен оралам,
Мен сені жолықтырам,
Мен о заман шынымен күліп тұрам.
Ібілістей іңірде адастырып,
Жарың қойған заңдарды ұмыттырам.

Мен оралам,
Бақ жана бастағанда,
Тапқан досың жапанда тастағанда.
Мен оралам, тойыңда.
Ең әдемі
жырымды оқып кетемін тосты алам да.

Мен оралам,
Ол күндер атар, қалқам.
Тірілермен тірлікте қатар болсам.
Сол себепті сен маған қарғыс жаудыр,
Бірақ, олай жасауға бата алмасаң...

Күт мені!

РИНАТ ӘБДІҚАЛЫҚ