Аяқталған ертегі!

Нелер алдым,бердім нені,бермедім?
Тақпадым ба тым артықтау елге мін?!
Көкке ұмтылып қоймадым ба байқамай
Ұмытылып кеткен жоқ па жердегім?

Не үйреттім?Нені үйрендім?Кім білед(і)?
Шамам келсе айтатыным шындық ед(і)
Біреу келіп сүйіп жатса бетімнен
Сырттан қарап біреу тұрды "жынды" деп

Нелер көрдім?Не көрмеді көздерім?
Қаза алдым ба тереңірек сөз кенін?
Жамауымды жамай алмай жүргенде
Күлмедім бе жыртығына өзгенің?

Не естідім?Естімедім нені мен?
Әділеттің баспадым ба белінен?
Сөз таразым тартылғанда талқыда
Арамдықпен жегем жоқ па келіден?

Айтпадым ба адамдықтың босқа әнін?
Айдан алып еш өтірік қоспадым
Соңғы әніме соңғы нүкте қойдым да
Өз жөніме кетіп барам достарым

Біреуге артық,біреуге бағын кем берді
Аспасын деп сызып беріп шеңберді
Шекарадан шығып кетіп жатсақ та
Жақсы көре беремін мен сендерді

Тағдырынан озып келер ерте кім?
Ақ көңілім иманымның серті едің!
Артқа тастап естелігін өткеннің
Аяқталды осылайша ертегім!

(С)Абзал Алтый