Ілияс Жансүгіров

Бақыттымын

Бұл бетте «Бақыттымын» атты Ілияс Жансүгіров жазған өлеңнің мәтіні берілген. Өлең тексті, өлең жолдары және толық нұсқасы осы жерде жарияланған.

12.07.2018
0
0
10554

Улы өмірімді,
Сұр көңілімді
Талақ еттім, тастадым.
Нұрлы өмірге,
Гүл көңілге
Енді шыға бастадым.
Таңдап сүйіп,
Кеп жыл күйіп,
Бақ есігін ашқаным.
«Өмір қызық»
Деген сөзді
Бір өзіңмен растадым!

1932 жыл

*∙*∙*

Сүйегімді босатқан,
Серігімсің жасатқан.
Сүйдім сені, өміріме,
Сөзім, антым - осы айтқан!
Жанымды сен жаңартқан,
Өмірімнен тазартқан.
Жүрегімсің шер тартқан.
Серігімсің қол артқан.
Мен сүйген соң сүйерсің,
Мен күйген соң, күйерсің,
Сүйгендіктен сыйлармын,
Сыйыңды өзің білерсің.
Ардақтармын сүйген соң,
Көңіліңе жіп салмаспын,
Өзгерермін біржола,
Мен бұрынғы болмаспын.
Ден қоярмын мен саған,
Білерсің де билерсің.
Сыйларсың да күтерсің,
«Би» осыған үйренсін!

1932 жыл

бақыттымын Ілияс Жансүгіров өлеңдері

Пікірлер (0)

Пікір қалдырыңыз

Жиі қойылатын сұрақтар