«Шілдені» оқығанда…

Тұрпаты шымыр киік асығындай,
бар сыры жайнап-ақ тұр жасырынбай.
Талдырмаш тал бойында артық тұрған
бір қылаң жоқ иненің жасуындай.
Қазақтың қарапайым қара қызы
тербетіп жапырағын дала жүзі,
Өлең-жыр өлкесінің ой-жырында
басқан сайын жосылып барады ізі.
Жанының кілтін тауып бұрағасын,
қалай ғана толғанбай тұра аласың,
сомдап соғып Адам мен Махаббаттың
жырменен күмбездепті-ау мұнарасын.
Шабыт желі қиялын қолдағаны
озбырлыққа бой бермей долданады,
намысына шаң-тозаң түспесін деп,
кейде ол Ақбөбек боп толғанады.
Талантын тотықтырмай баптап қатты,
жүйріктердің аяғын аттатпапты.
«Сеңдей қалқып селтиген сарыларға»
аяулы ақ намысын таптатпапты.
Ерімес жүрегінің қары бардай
махаббат азабынан арыла алмай,
жанынан жалын шаша толғанады
Қыз Жібек боп құсадан арыла алмай.
Лебізі әсем қоңыр майда болып,
қиялымен көк шарлап, Айға қонып,
керілсе, Керекуден бір-ақ шығып,
кейде ол ән шырқайды Майра болып.
Көрмеген елеусіз боп жырақ қалып,
шықты да топ ішінен бір-ақ барып,
Жантолының жар жыққан жан толқынын
тастапты көмейінен бір ақтарып.
Кейде ол сөз қаруын алмас қылып,
қыз бейнесін ерлермен алмастырып,
дауылдатып кеткенде жерлері бар
Махамбеттің аруағын жалғастырып.
Аттанса айшылыққа ара қонып,
бір уақыт баламен де бала болып,
өмірдің өресіне өрлеуменен
кетеді кейде ақ шаш ана болып.
Өмір солай өрнегін өсірген бе,
алысқа шырқап кетер көсілгенде,
өксігі өзегінен арылмаған
тіл тауып сөйлесіпті жесірмен де.
Үлесі солай өлшеп берілген бе,
шошайып ол өзгеден жерінген бе,
Үндістанды аралап өз үйіндей
сырласар тіл тауыпты негрмен де.
Әлемде жойылсын! - деп талау - бүлік,
лебізін мәңгі сөнбес алау қылып,
достық пен махаббатқа толып тұрған
жүрегін көтереді жалау қылып.
Күші оның жүрегі мен тілегінде,
сенімін балайды көк тірегіне.
Тар қапас зынданға да түсіп барып,
зерттепті қарақшының жүрегін де.
Ақындық тұғырына дара қонып,
берер қолы көрмепті ала болып.
Қазақтың қайта туған бір қызы бұл
біздер үшін Шолпан боп, Сара болып.
Жырын жұтып шөлдесем, қанатынмын,
сезуші ем шырақ болып жанатынын.
Тілеймін жыр шыңына самғап ұшқан
топшысы талмасын деп қанатының!!!

---