Бала тілек – Ақгүл Тұрсынбай

Жұмыртқаның жарымай уызына,
Аузын ашқан ақ үрпек балапандай,
Умаждалып тағдырдың уысына,
Сезбей жүрмін, от құшақ ана қандай?
«Сенің анаң некесіз бала тауып,
Тастап кеткен қоқысқа жаны ашымай»,-
Деп үнемі жалпақ жұрт жала жауып,
Қаралайды өзіңді анашым-ай...
Жұдырықтай жүректің бұрышынан
Төбелдей жер бағыма бұйырмады.
Сәлем жолдап, қарлығаш-жыр ұшырам,
-Есіңе ал,- деп қалқаңды қиырдағы.
Құс-кілемге жайғасып ұшамын да,
Артта қалып тар қапас, қара түнек.
Анашымның от-жалын құшағына
Енсем дейді бейкүнә, бала тілек.