Не көп?

Кей доста келісуден керісу көп,
Өсек пен өтірікке ерісу көп.
Көзге — дос, сыртыңнан — қас, іштен — араз,
Сылтау қып сәл нәрседен жерісу көп.
Есептеп бірін — онға, онын — жүзге,
Тірнектеп дау-жанжалды терісу көп.
Айналып бас жағы — өкпе, арт жағы — өртке,
Дұшпан боп, досын ұстап берісу көп.
Ұшқыннан өрт қашқандай ақырында,
Артында әлектенер елі шу боп.
Тентектей түстен кейін ес кіретін
Пайда не, өшіккенсің, жеңісу боп?!

1911

---