Капитан болу ұнайды

Үстінде шалқар көк айдын
Өткізіп жүрер күн-айды,
Киімі жолақ жейделі
Капитан болу ұнайды.

Үйретсе толқын өрлікті,
Танытып ерен ерлікті,
Тоғасы алтын белдікті
Киімін киіп капитан,
Шарлаймыз шалқар кеңдікті.

Тулайды теңіз, тулайды,
Тынбайды күн-түн шулайды.
Ақ жалды асау толқындар
Төзімді сынап, шыңдайды.

Омырауды жел керіп,
Толқында ақ жал тербеліп,
Жүзген қызық, тұрса егер,
Ерлігіңді ел көріп.

Жоталы толқын – айдан ақ
Кемені ұрса ай қабақ,
Капитан тұрар тік қарап,
Соқса да дүлей қайталап.

Арманның атып ақ таңы,
Капитан болсам саптағы,
Өмірге алғы жол ашып,
Жұлдызым шырақ жаққаны.

---