Есіңнен шықпас ойдан ба

Есіңнен шықпас ойдан ба,
Естінің сөзін қимайсың.
Жаңаны былай қойғанда,
Ескінің өзін қимайсың.
Көк талдың күнге бойлаған
Бүршікті көзін қимайсың.
Құйрығыменен ойнаған
Күшіктің өзін қимайсың.
Моншақтан қара аумаған
Торғайдың көзін қимайсың.
Шалшықта жатып аунаған
Торайдың өзін қимайсың.
Қалса да топқа ере алмай,
Арғымағыңды қимайсың.
Кей кезде тіпті сараңдай
Сарғұлағыңды қимайсың.
Шідерін үзген бұзықтың
Бұзбайды өзі ұясын...
Ертеңіменен қызықты
Өмірді қалай қиясың?!

---