Ала жібін ешкімнің аттамадым

Ала жібін ешкімнің аттамадым.
Ақты даттап,
Қараны ақтамадым.
Көз салмадым біреудің қалқасына,
Жетіп жатыр өзімнің ақ тамағым.
Бата беріп жас талап,
Көк өрімге,
Қиналмай-ақ өлемін өлерімде.
Қызғанбадым ешкімнің өлең-жырын,
Жетіп жатыр өзімнің өнерім де.
Өтті кетті не қызық,
Не бір ойын.
Көтеріліп басылды қамыр-ойым.
Шаруам қанша біреудің атағында,
Жетіп жатыр өзімнің абыройым.
Айтқаныма, ағайын, сенші бүгін.
Ұнатпаймын ауылдың мен шылығын.
Өзге адамның мініне күле алмаймын,
Жетіп жатыр өзімнің кемшілігім.

---