Арманына жеткен ауыл – Қадыр Мырза Әли

Таң қалмайсың заманға енді қайтіп!
Ақиқат боп аңызың келді қайтып.
Ауыл шалы бүгінде отырады
Америка жайында әңгіме айтып.
Дүние емес барқытың,
Пүлішің де.
Еңбек етсе қазақтар —
Күні үшін бе?!
Телефонды aп әжеміз
Берлиндегі
Сөйлеседі ұлымен түн ішінде.
Бозбалалар,
Боздақтар бұл қатарда
Батырларша баяғы түн қатар ма?!
Маңмаңгердің тарамай құйрық-жалын.
Машинасын жуады күн батарда.
Кенжесіндей заманы еркелеткен
Бұл арадан ескілік ерте кеткен.
Көрші ауылдың қазағы тойға келген
Қой жетектеп түседі вертолеттен.
Қарыштаудай заманы қарыштады.
Жаңалықтың ауылда бар штабы.
Естіліп-ақ жатады шет жайлауда
Космонавтың дауысы ғарыштағы.
Бұл ауылдың бойына құты сіңбей,
Бақыттың да жанбайды оты сөнбей.
Күн нұрымен ойнайды антенналар
Әр шатырдың әдемі үкісіндей.