Қадыр Мырза Әли

Арам дәулет, сірә, менен қаймықты

Бұл бетте «Арам дәулет, сірә, менен қаймықты» атты Қадыр Мырза Әли жазған өлеңнің мәтіні берілген. Өлең тексті, өлең жолдары және толық нұсқасы осы жерде жарияланған.

29.04.2019
0
0
3333

Арам дәулет, сірә, менен қаймықты.
Алған жоқпын жұрттан артық айлықты.
Жылқыменен,
Түйеменен,
Қойменен
Есептеген емеспін мен байлықты.
Қадыр тегін жібермес деп уақытты,
Құрдастарым мені талай қағытты.
Шығуменен биігіне мансаптың
Есептеген емеспін мен бақытты.
Болмыс солай алақанға сызыпты:
Бір-ақ мәрте сыйладым мен жүзікті.
Қанша қызды құшақтаумен,
Құшумен
Есептеген емеспін мен қызықты.
Ел-жұртыма ұнамасам — қамықтым.
Әр күн онда менің үшін тамұқ-тұн.
Байлығым да,
Бақытым да,
Қызық та —
Маған қалай қарауында халықтың!

Қадыр Мырза Әли халық арам дәулет сірә менен қаймықты Қадыр Мырза Әли өлеңдері

Пікірлер (0)

Пікір қалдырыңыз

Жиі қойылатын сұрақтар