Өлең, жыр, ақындар

Көктем

  • 30.04.2019
  • 0
  • 0
  • 3490
Ақ күмбезді моласында
Аруақтарды бір аунатып,
Көне қазақ даласына
Келді көктем тыраулатып.
Келді көктем бір ұл болып,
Бір қыз болып —
Күрсінбелік!—
Денелерге діріл болып,
Жүректерге дүрсіл болып.
Алағызған ақындарға
Алып ұшқан шабыт болып.
Ауру жеңген жақындарға —
Амал қанша!—табыт болып.
Көл бетіне күміс болып,
Көк жайлауға тыныс болып.
Жалқауларға күліс болып,
Шаруаларға жұмыс болып.
Бұлақтарға сылдыр болып,
Құлақтарға тықыр болып.
Теректерге сыбдыр болып,
Төсектерге сықыр болып.
Махаббатшыл пысықтарға
Орындалмас он серт болып.
Мияулаған мысықтарға
Мәңгі бітпес концерт болып.
Жалбыздарға көрік болып,
Жалғыздарға серік болып.
Жұбайларға берік болып,
Жеңгейлерге жерік болып.
Амандарды бір қуантып,
Аруақтарды бір аунатып,
Келді көктем қиқулатып,
Келді көктем тыраулатып!



Пікірлер (0)

Пікір қалдырыңыз

Адырна

  • 0
  • 0

Қақыратып шыдамның қабырғасын,
Әлі талай айтылар Қадырға сын.
Идеялар жетсін деп нысанаға,
Шірей тарттым ақылдың адырнасын.

Толық

Тіршіліктің тыңдап көр қоңыр күйін

  • 0
  • 1

Тіршіліктің тыңдап көр қоңыр күйін:
Адам түгіл,
Тозады темір бұйым.
Тұрмыс пенен өмірді шатыстырма,

Толық

Сен тұрған үйдің тұрғыны

  • 0
  • 0

Сен тұрған үйдің тұрғыны —
Көршіңе бәрін бересің.
Оның да бірақ бір күні
Оңбағандығын көресің.

Толық

Қарап көріңіз