Жаңылтпаштар

Сұқсыр үйрек
Ұшқыр үйрек десек те,
Тұмсығы үшкір үйрек
Сұқсыр үйректен күйрек пе?

---

Райхан, раушан реңділес
Реңдестерім ренжіспес.
Раушанның райханы,
Райханның раушаны,
Рахатта реңсізденбе.

---

Оюға ою өрнектеп,
Үйрет өстіп қолды ептеп.

---

Оралдан омарташылар оралды,
Оралбай аға орманға орналастырды оларды.

---

Лекер лыпыл, лепілдек
Лайдан лезде лепілдеп,
Лайсаңдағы лездігін
Лебіздеді лепіре лекіп.

---

Кітапты
Қанапия мен Құныпия,
Аса құпия
Ара-тұра, шала-пұла оқыды.

---

Күш, күш, күшігім,
Қарда жатсаң үсідің.
Кір, кір, үйге, күшігім,
Ки көкемнің ішігін!

---

Күн күнді көктен.
Күткенбіз көптен.
Көкүйек көктем,
Келіпті көшіп
Көгал, көлшімекпен.

---

Көп-көп көк жеп,
Келді көжек.

---

Жағада жатыр ек,
Жақыпбек жақын кеп,
Жаңылды шақырып,
Жатыр деп
Жомартты нұсқады.

---

Жайлауға бар, мал қайтар,
Түйеге: "Әй!" дей сал!
Сиырға айқай сал!
Жылқыға бар ма айтар?

---

Жадырамыз
Жайдан-жай жадырамайды.
Жай жағдайы
Жақсарса жайдарыланады.

---

Зерек зергер зерделеп,
Зергерлеуші зер зерлеп.
Зерлілер затын зерлеткен
Зергерлік те зерделік.

---

Дөңгелек гүрілдеді,
Теміржолдар дірілдеді.
Сәби көзін бір ілмеді,
Үн шығарып «уілдеді».

---

Доп,доп, доп екен,
Доп қуғандар көп екен.
Допты тепті Төлеген,
Төлеген тым тебеген.

---

Дәмді дәмдер дайындаған Дәмелі,
Досы дәмін дәріптер деп дәмелі.
Дәмін досы «Дұрыс дәмді» демеді.

---

Есікпе-есік отырғандар
Есіктерін тесіп-тесіп тастапты...

---

Ерен еңбекте,
Екпін есте.
Енжар емес
Еңбектес те.

---

Елеусіздің елеуіші елегіш
Елеместің елеуіші елегіш.

---

Екі аяқ сабалайды -
Доп домалайды.

---