Армандардың бастауы-отбасының ақ тілеуі

Әр адамның жүрегінде биік армандар, жарқын мақсаттар бар. Сол арманға жету жолы әркімде әртүрлі, бірақ бәрімізге ортақ бір нәрсе бар – ол отбасының қолдауы мен ақ тілегі. Арманның қанат жаюына, сенімнің оянуына ең алғаш ықпал ететін – отбасындағы жылы сөз, жүректен шыққан тілек. Отбасы – адам өмірінің алғашқы мектебі, ал сол мектептегі ең мейірімді ұстаз – әже. Әженің мейірімі мен ақ батасы баланың өмірінде ерекше орын алады. Менің өмірлік арманым мен талпынысымның бастауы – әжемнің ақ батасы мен отбасының шексіз қолдауында жатыр.

Әжем менің өмірімдегі ең ерекше, мейірімге толы жан. Ол кісі "Арманы жоқ адам – қанатсыз құспен тең" деп жиі айтатын. Бұл сөз менің жадымда мәңгіге жатталып қалды. Әжем – тек үйдің тірегі емес, тұтас әулеттің рухани ұстазы болды. Оның "жақсы ниет – жарым ырыс" дейтін сөзі маған әрқашан күш берді. Мен қанша рет шаршасам да, әжемнің ақылы мен батасы мені қайта қанаттандырып, жігерлендіріп отырды. Дәл қазіргі сәтте журналист атану деген арманым мақсатыма айналып отыр. Осы мақсатты негізге ала отырып, еңбек етіп келемін.

2023 жылғы әлеуметтік зерттеу нәтижесінде қазақстандық жастардың 73%-ы өмірлік мақсаттарына жетуде ата-анасының қолдауы маңызды екенін мойындаған. Бұл – отбасының, әсіресе ата-әженің рухани әсерінің күшті екенін дәлелдейді. Әжемнің "сенің қолыңнан бәрі келеді" деген сенімді сөзі мені талай сәтте алға жетеледі. Ол кісінің өзі де қиыншылықты сабырмен жеңіп, бәрімізге үлгі бола білді.

Заманауи әлем – шапшаң әрі күрделі. Мұндай ортада адам өз-өзіне сенбесе, адасуы мүмкін. Сол сенімді беретін – отбасы, оның ішінде ақ жаулықты әженің ақ батасы. Армандар аспаннан түспейді. Олар отбасындағы жылы сөзден, ақ тілектен, сенімнен бастау алады.Адам өз жолында талай қиындықпен бетпе-бет келеді, бірақ оның бәрін жеңудің сыры – жанұяның мызғымас сенімі мен мейірімі. Қаншама технология дамыса да, адам жүрегінің тереңінде рухани күшке деген мұқтаждық бар. Менің қазіргі мақсаттарым мен жетістіктерім – тек өз еңбегімнің ғана емес, әжемнің ақ батасы мен отбасының шексіз қолдауының арқасы. Сондықтан заманауи болсақ та, дәстүрлі құндылықтарды ұмытпау – біздің ең үлкен артықшылығымыз.

Әлеуметтік желілерде бөлісіңіз: