Онлайн білім берудің пайдасы мен зияны

    Онлайн білім беру — интернет арқылы қашықтан жүзеге асырылатын оқу форматы. Бұл жүйе оқушы мен мұғалімге географиялық шектеусіз, кез келген жерден білім алуға мүмкіндік береді. Оқу процесі онлайн платформалар, бейнесабақтар, интерактивті тапсырмалар және кері байланыс арқылы ұйымдастырылады. Пандемия кезеңінде онлайн білім беру қарқынды дамыды. 2020–2021 жылдары Қазақстанда оқушылардың шамамен 80%-ы қашықтан оқыды, бұл әлемдік үрдіске сай келді. Forbes.kz деректеріне сәйкес, онлайн білімге сұраныс 80%-ға дейін артқан. Алайда бұл форматтың артықшылықтарымен қатар, бірқатар кемшіліктері де анық байқалды.

Онлайн білім берудің басты артықшылығы — икемділік. Оқушылар материалды өз қарқынымен меңгере алады. Сонымен қатар, жол жүруге кететін уақыт пен қаржы үнемделеді. Онлайн платформалар арқылы әлемнің кез келген жеріндегі курстарға қол жеткізу мүмкіндігі артты. Сарапшылардың пікірінше, қашықтан оқу оқушының өздігінен білім алу дағдысын дамытып, жауапкершілігін күшейтеді. Дегенмен, онлайн білім берудің кемшіліктері де аз емес. Ең негізгі мәселе — бетпе-бет қарым-қатынастың болмауы, бұл білім сапасына әсер етуі мүмкін. Техникалық қиындықтар мен интернетке тәуелділік оқу процесін тежейді. Зерттеулерге сүйенсек, үй жағдайында оқитын оқушылардың зейіні жиі ауытқып, оқу мотивациясы төмендейді. Сонымен қатар, медицина, педагогика секілді тәжірибелік дағдыны қажет ететін мамандықтарды онлайн форматта меңгеру қиын.

Онлайн білім беру — уақытша жағдайда тиімді шешім болғанымен, ол дәстүрлі білімді толық алмастыра алмайды. Сарапшылар пікірінше, ең тиімді модель — онлайн және офлайн білімді үйлестіретін аралас оқыту жүйесі.

«Journiverse» білім беру орталығының оқушысы: Есілбаева Жанель