Әйгілі ғалым Альберт Эйнштейннің дүниеге келген күні

Әлемге әйгілі ғалым, физика ғылымының ірі өкілдерінің бірі Альберт Эйнштейн 1879 жылы 14 наурызда Германияның Ульм қаласында дүниеге келді. Оның әкесі Герман Эйнштейн электр жабдықтарын сатумен айналысқан кәсіпкер болса, анасы Паулина Кох музыкаға жақын, өнерді сүйетін адам болған. Болашақ ғалымның балалық шағы Германияның Мюнхен қаласында өтті.

Эйнштейн бала кезінде тұйық әрі баяу сөйлейтін бала болғаны туралы деректер бар. Бірақ ол табиғат құбылыстары мен техникаға ерекше қызығушылық танытқан. Әсіресе компасқа қарап, оның тілінің не себепті үнемі солтүстікке бағытталатынын ойлап, ғылымға деген қызығушылығы арта түскен. Мектепте ол математика мен физика пәндерін ерекше жақсы көрді. 1896 жылы Эйнштейн Швейцариядағы Цюрих қаласындағы Федералдық политехникалық мектепке оқуға түсті. Оқу орнын 1900 жылы аяқтағаннан кейін ол Швейцарияның Берн қаласындағы патент бюросында жұмыс істеді. Дәл осы жерде жұмыс істеп жүрген кезде ол өзінің ең маңызды ғылыми еңбектерін жазды. 1905 жыл ғылым тарихында “Эйнштейннің ғажайып жылы” деп аталады. Сол жылы ол төрт маңызды ғылыми мақала жариялады. Бұл еңбектер физика ғылымының дамуына үлкен әсер етті. Сол мақалалардың бірінде фотоэффект құбылысы түсіндіріліп, кейін осы зерттеуі үшін 1921 жылы Нобель сыйлығына ие болды. Сонымен қатар ол арнайы салыстырмалылық теориясын ұсынды. Бұл теория кеңістік пен уақыттың бір-бірімен байланысты екенін дәлелдеді. 1915 жылы Эйнштейн жалпы салыстырмалылық теориясын жариялады. Бұл теория тартылыс күшін кеңістік пен уақыттың иілуі арқылы түсіндіреді. Кейін бұл теория астрономия мен ғарыш ғылымының дамуына үлкен әсер етті. Бүгінде ғалымның бұл теориясы қара құрдымдар, гравитациялық толқындар сияқты құбылыстарды түсіндіруде қолданылып келеді. 1933 жылы Германияда нацистік билік орнағаннан кейін Эйнштейн АҚШ-қа көшіп, өмірінің соңына дейін Принстон қаласында ғылыми жұмыстармен айналысты. Ол тек ғылыммен ғана емес, бейбітшілік пен адам құқықтарын қорғаумен де айналысты.

Альберт Эйнштейн 1955 жылы 18 сәуірде АҚШ-тың Принстон қаласында қайтыс болды. Ол өмірінің соңына дейін ғылыммен айналысып, көптеген ғалымдарға үлгі болды.