«Мұқағали мұрасы – ұрпаққа аманат»

«Мұқағали мұрасы – ұрпаққа аманат»

Автор: Аманкулова Назерке Балтабекқызы

Алматы қаласы, Әуезов ауданы, №122 жалпы білім беретін мектептің түлегі                          

 

                «Мұқағали мұрасы – ұрпаққа аманат»

Мұқағали Мақатаевтың 95 жылдық мерейтойына арналған кездесу 

Жуырда №122 жалпы білім беретін мектепте қазақ поэзиясының жарық жұлдызы Мұқағали Мақатаевтың 95 жылдық мерейтойына арналған тағылымы мол, рухани кеш өтті. «Есіңе мені алғайсың» атты әдеби-танымдық кештің басты қонақтары — ақынның ұлы Жұлдыз Мұқағалиұлы Мақатаев пен келіні Бақытгүл Қыдырбайқызы болды. Бұл кездесу оқушылар үшін үлкен мәртебе ғана емес, жүректерінде ұзақ сақталатын ерекше рухани сәтке айналды.

Кештің басты мақсаты – оқушыларға ұлы ақынның шығармашылық мұрасын тереңірек таныстыру, оның өлеңдеріндегі адамгершілік, махаббат, туған жерге деген сүйіспеншілік сияқты құндылықтарды дәріптеу болды. Мұқағали Мақатаевтың жырлары арқылы жас ұрпақтың рухани дүниесін байыту – кештің негізгі өзегі болды.

Кеш барысында оқушылар ақынның өлеңдерін мәнерлеп оқып, оның шығармаларынан көріністер қойды. Сахнадағы әрбір қойылым ерекше дайындықпен ұсынылып, көрермендердің ыстық ықыласына бөленді. Әсіресе, ақынның терең мағыналы өлеңдері оқылған сәттерде зал ішін ерекше тыныштық пен тебіреніс биледі.

Мен осы кеште жүргізуші ретінде қатысып, қонақтармен сұхбат жүргізу мүмкіндігіне ие болдым. Сұхбат барысында Мұқағали Мақатаевтың өмірі, отбасы, мінезі, шығармашылық жолы туралы тың деректер айтылып, оқушылар үшін өте құнды ақпараттар ұсынылды. Қонақтар ақынның қарапайымдылығы, шынайылығы мен адамгершілік болмысы жайлы жүрекжарды естеліктерімен бөлісті.

Кездесу тек біржақты емес, өте еркін әрі ашық форматта өтті. Оқушылар да өз тарапынан сұрақтар қойып, пікір білдіріп, белсенділік танытты. Бұл олардың әдебиетке деген қызығушылығын арттырып, ой-өрісінің кеңеюіне ықпал етті. Осындай кездесулер арқылы оқушылар тек білім алып қана қоймай, рухани тәрбие де алады.

Кештің ең әсерлі сәттерінің бірі — қонақтардың оқушыларға ақ батасын беруі болды. Ақын ұрпағының жүректен шыққан тілегі әрбір қатысушыға ерекше әсер қалдырды. Бұл сәт залда отырған барша жанға жылулық сыйлап, ерекше атмосфера қалыптастырды.

Сонымен қатар, кеш барысында мектеп ұжымы қонақтарға алғыс білдіріп, естелік сыйлықтар табыстады. Кездесу соңында барлығы бірге естелік суретке түсіп, бұл күннің маңыздылығы тағы да айқындала түсті.

Осындай мазмұнды шаралар жас ұрпақтың бойында ұлттық рухты қалыптастырып, әдебиетке, өнерге деген сүйіспеншілігін арттырады. Мұқағали Мақатаевтың мұрасы – мәңгілік құндылық. Оның өлеңдері мен ойлары әрдайым ұрпақ жадында сақталып, жүректерінде өмір сүре бермек.

Бұл тағылымды кеш әрбір қатысушы үшін ұмытылмас әсер қалдырды және болашақта да осындай рухани кездесулер жалғасын табады деген сенімдемін.

---