Шеберлер

Бар бір шебер жалғанда
Бармағынан бал тамған.
Өзен, тау да, орман да
Тым өзгеше ол салған.
Бояуы көп сол шебер
Жылда жұртты таң қылған.
Бұлт күркіреп жауса егер,
Жер сұйылса жаңбырдан.
Шая алмайды жүз қабат
Жуса соның өрнегін.
Тоя алмаймыз біз қарап,
Еңкейгенше жерге күн.
Жарқырамақ ол жаңа,
Жауған сайын жас жаңбыр.
Жаралған соң бола ма
Сиқыр қолмен басқа бір!
Май суреті, май шебер
Оған талас, дау бар ма!
Оның сөзі — ем, айтса егер
Өзен, орман, тауларға.
Сүйсінемін бірақ мен
Екінші бір шеберге.
Егіз туған сол атпен
Қасиет те, өнер де.
Көрмеді оны кім байқап,
Сезбеді оның лебін кім?!
Шебер деп ел күнде айтпақ
Партиясын Лениннің.
Шебер қолмен тізген ол,
Шыдар ұзақ жылдарға,
Бізден әсем, бізден мол
Жер бетінде гүл бар ма?!

---