Барлық-Арасан

Жаныңа ем —
Дәру қарасаң,
Іздеп сен
Баруға жарасаң —
Жетісу бойы
Ыстық су —
«Алма-Арасан»,
«Қапал-Арасан» —
Бәрінен мықтысы
«Барлық-Арасан».
Алдында бүйректей
Тауды қарасаң,
Бейне бір шүмектей
«Барлық-Арасан»,
Атылған аспанға
Ақ жалын секілді,
Ем дейді орасан
Ауруға не түрлі.
Сондықтан ол «Барлық»
Атанған ежелден.
Қайнатпай қазандық,
Сол суға салып ап
Етін де жей берген.
Аңыз ба ол, бәлкім,
Ел, бірақ, емделген.
«Барлық» не? — денсаулық,
Барлық, амандық.
Аз күн жол салып,
Бардық, дем алдық.
Жаныңа ем —
Дәру қарасаң,
Іздеп сен
Баруға жарасаң,
Жетісу құты,
Ып-ыстық сүті,—
«Барлық-Арасан»
Еліңе айтып
Тауыспас тамашаң,
Шіркін,
«Барлық-Арасан!»

---