Балқадиша

Қазақстан Магниткасының құрылысшысы Балқадиша Шалқароваға

Балқадиша, бал еркесі Нұраның,
Сен әсемсің — сен де сұлу бір ағын.
Сенің көзің жағар болса шырағын,
Іздемеймін мен киіктің лағын.
Балқадиша, биігіңнен түс төмен,
Сені мақтап аққу демен, құс демен.
Сен адамсың адам ісін істеген,
Балқадиша, биігіңнен түс төмен.
Мақтамаймын, мақтап жатса, иланам,
Сен болыпсың еңбегіңмен сыйлы адам,
Саған арнап жаза қалса жырды ағаң,
Балқадиша, есіміңді қимаған!
Баспалдағың бұлтқа дейін өрлеген,
Тұрсың алыс, тұрсың биік сен менен,
Естілмейді дауысың да «кел» деген,
Биік құмар болдың мұнша сен неден!
Балқадиша, мейлі әйтпесе, ұша бер,
Арманыңды, аспаныңды құша бер,
Өзі-ақ сені жерге бастап әкелер
Бір қайсардың махаббаты қуса егер.

---