Тентек теке

Тентек Теке бір күні
Сөзге келді күлкілі:
– Ей, Қошқарым, Қошқарым,
Сен бір жүрген мес қарын.
Қашан көрсем салбырап,
Балақ жүнің жалбырап,
Жүрісің еш өнбейді,
Өнерімді көр, мейлі:
Қарғи алам биіктен,
Кем соқпаймын Киіктен, –
Деді дағы бақылдап,
Жарқабаққа жақындап,
Кетті құздан секіріп,
Қалды Қошқар өкініп,
Қарамаған күшіне
Ақымақтың ісіне.
Қошқар жетті ентігіп,
Теке халін көргелі.
Мақтанам деп мертігіп,
Жатыр екен өлгелі.

---