Ауылдағы ағалар – Абдрахман Асылбек

Ауылдағы ағалар, армысыңдар?
Дарқан көңіл қалыпта бармысыңдар?
Өздеріңді ойласам сағынышпен,
Көз алдыма келеді қарлы шыңдар.
Бұлақ болып бір тынбай ағасыңдар,
Барар жерді бұлжытпай табасыңдар.
Елдік пенен жаралған ерлік үшін,
Жандарыңда жаз жайлау жарасым бар.
Қысылғанда – қамқоршы панасыңдар,
Адасқанда – жол сілтеп бағасыңдар.
Дастарқанға шашылып бар асылдар,
Барған сайын шабылып қаласыңдар.
Кезек-кезек шақырып, қонақ қылып,
Сыйластықпен қуана қол ап тұрып,
Қимастықпен шығарып саласыңдар,
Ықылыспен от құшақ орап тұрып.
Өмірлері өнеге, жатқан аңыз,
Ағаларға ардақты мақтанамыз.
Алдарына аңсап бір барған сайын,
Айрықша бір сезіммен аттанамыз.