О, дүние

О, дүние, салма ойымды әлекке,.
Менің тіпті көлеңкемнен дәметпе.
Салтанатты осы өмірдің меншігі –
Жарайтұғын нәрсем болса әжетке.
О, дүние, ойлап сені не етемін?
Жарқын өмір – менің нұрлы мекенім.
Бәрі осында – дұшпаным да, досым да,
Мен оларды тастап қайда кетемін?
Достарыммен жарасамын, жарысам,
Дұшпаныммен қағысам да табысам.
О, дүние, өкпелеме, аулақ жүр,
Тіршіліктің мәні осы, танысаң.

---