Алатау аясында

Жетісу – жер жаннатым,
Әсем қалам Алматым.
Өлеңімді алғашқы
Бір өзіңе арнадым.
Асқақ Алатауың бар,
Жеміс толы бауың бар.
Сұлулығыңды шын ұққан
Қазақ деген қауым бар.
Тауларың биік дем берген,
Таза ауаң тәнге ем берген.
Сенің Алатауыңды
Тәңіртаумен тең көргем.
Балдай тәтті бұлағың –
Сылдыраған нұр ағын.
Татқан сайын суынан,
Арта түскен құмарым.
Сенде туып бір өлең,
Қалыптасқан мың өнер.
Қасиетің бар жандарды
Ақын қылып жіберер.

---