Қоңыздар

Мен өмірді толқынды теңіз деймін,
Сол толқыннан маржан сөз – кен іздеймін.
Ал, тек қана байлықты мансұқ тұтқан
Туысымның бәрін де қоңыз деймін.
Мен оларды кім дейін қоңыз демей? –
Ақша қуған, адамдық жол іздемей.
Үйге келсе, мүлкіммен бағалайды,
Ойға батып мүлгіген мені іздемей
Қоңыз-дағы өзінше еңбек етер –
Боқ илеуді жаз бойы ермек етер.
Құмалағын күз күні інге тығып,
Тас қараңғы қыс бойы көрге кетер.
Көрдегі адам – бәрібір өлген адам,
Жазғанына жазмыштың көнген адам.
Ит тірлікпен өтуге тиіс емес,
Құдіретіне Құдайдың сенген адам.
Мақтанбаймын дүние жиғаныма,
Шүкіршілік сенім мен иманыма.
Ризамын Алланың мейіріммен
Жарық сәуле санама құйғанына.

---