Мен жастарға сенемін, сеніп өтем – qanatuly_nauryzbai

Тәуелсіз елдің текті ұрпағы -
Алтынның сынығы бек сұлтаны.
Еліне еркелеген тентегі,
Тау тасын теуіп өскен тұлпары.
Даланың дарабозы, дарасы,
Көгіме қанат қаққан сұңқары.
Жалынды жастар үшін жігерлі -
Қағазға жазайын мен жыр тағы.

Бастау алар табиғаты Алаштан,
Еншісінде қара жер мен көк аспан,
Әрқашанда ынтымағы жарасқан,
Мен жастарға сенемін, сеніп өтем!

Қарияның қадірлі қасиетін,
Санасында сақтаған өсиетін,
Ұлтына ұлы болған бас иетін,
Мен жастарға сенемін, сеніп өтем!

Ата-баба аманатын сақтайтын,
Үміт жолын қия баспай ақтайтын,
Ар-намысын биік қойып баптайтын,
Мен жастарға сенемін, сеніп өтем!

Ақ сүтімен дарып өскен анамның,
Дарабозы, дарасыда даламның,
Ғаламаты бола білген ғаламның,
Мен жастарға сенемін, сеніп өтем!

Ұл-қызы өзгелерге арман болған,
Құраны мен ұраны қорған болған,
Қалың қазақ жиылса орман болған,
Мен жастарға сенемін, сеніп өтем!