Абайды аңсау

Абай жайлы бастар болсам сөз басын,
Абай - дана, қайта тумас тұлға, шың.
Ақын болса, мына ұрпақ егерде -
Ұлы Абайдай қазағымды жырласын!
Абай - жұлдыз, жарық берген қазаққа,
Жол көрсеткен қаратүнек, азапта.
Жүректерді тербететін жырларын -
Сеніп жазды бір болатын ғажапқа.
Абай - сәуле, нұрландырар кеудені,
Жыр қып жазды ахуалды елдегі.
Сезім беріп, тас боп қатқан жүрекке,
Жырларымен талай жанды емдеді.
Абай - тарих, түбі оның тереңде,
Ғұлама ғой, үлгі болған бар елге.
Қазақ үшін жан аямай күресіп -
Жан бітірді өлең деген өнерге!
Абай - мұра, қалатұғын мәңгіге,
Ойлар жазды мағыналы, мәнді де.
Абай жайлы айта берсең егерде -
Абай - архив, таусылмайтын әңгіме!
Аз ғана сөз айтты - бітті демеңіз,
Ұлы Абайдың жолын қуып келеміз.
Дәл Абайдай қазақ жайын ойлайтын
Ұрпақтардың боларына сенеміз!!!

---