АЛЫС ЕТШІ АПАТТАН...

*АЛЫС ЕТШІ АПАТТАН...*

О! Аллаһым сақта елді апаттан,
Сүріндірмей өткіз бәрін сынақтан.
Жұмағыңнан жай бере гөр кешегі,
Шахид болып кеткендерге ұшақтан.

Неге елде жиіленді апаттар?
Жүрегімде соған менің күмән бар.
Жоқ әлі де елде өршіп кетті ме?
Пенде жақтан үлкен-кіші күнәлар.

Бес сәбиім жанып елді күйзелтті,
Арысымды оқ-дәрілер күл етті.
Автобуста елу екі жан жанып,
Көңіл-күйді қасіретті мұң етті,
Шамалғанда пойыз сүйреп көлікті,
Сорлы қазақ қорқыныштан дүр етті,
Жердегі мұң аз болғандай қазаққа,
Аспанымнан ұшақ құлап мұң етті.

Шахид болып кеткендерге ұшақтан,
Е! Аллаһым жай бере гөр жұмақтан.
Ұйғыр,қазақ тағы басқа мұсылман,
Қорлық көріп жатыр онсыз қытайдан.

Қандай күнә белең алды елімде?
Осы сұрақ мазалайды мені де.
Енді сірә төмен түспей тұрсыншы,
Көк туымыз еңселі боп көгімде.

Жемқорлықтың салдары ма? Жоқ әлде?,
Имансыз боп баста тұр ма? бос сәлде.
Желтоқсанның аты суып кетті ғой,
Жоқтау болып жазарымыз мұңды әнге.

Отыз миллион болып кетті суреттер,
Аққу қонбай айдын көлге үйректер.
Заңсыз жолмен шетелдерге сатылып,
Жатқан жоқ па? Ішкі ағза бүйректер.

Байлар шіріп байып жатыр көсіліп,
Ұрпақтары шет елдерде есіріп.
Жай халық жүр баспанасыз сандалып,
Қарны аштықтан ыстан бауы шешіліп.

Шындықты айтса апта-айға қамалса,
Бір сөзбенен билік жауы саналса.
Халқым қашан бас көтеріп жүреді?
Жыртық жері құрғақ сөзбен жамалса.

Барлық апат сынақ білсең ел үшін,
Болу керек халықпен де келісім.
Бұдан былай толтырсыншы қазақтың,
Қуанышы бүкіл әлем желісін.

*Нұрлан Тотанов*

---