Сынықшының сырттаны

Нұрлан Батпенов -70

Тұлғасы таудай,
Мінезі батпан салмақты,
Батпенов батыр,
Бітірген шаруа жан-жақты,
Арманға биік,
Қырандай қаққан қанатын ,
Қасиет қонған,
Аталы жерден аруақты.
Сынықшы – өнер,
Қазақта болған бұрын да,
Атағы жеткен,
Атпенен бірге Ұрымға,
Атаның ісін
Көтерген жаңа биікке,
Апарған алға,
Негіздеп бәрін ғылымға.
Шипалы қолмен
Бір сипап өтсе жазылған.
Қисайған аяқ,
Сынған қол қайта созылған.
Бүлдіру оңай,
Бүтіндеу қиын қашанда,
Байқамай, бірақ,
Адамдар аз ба,
Емханаңыздан табылған!
Қолбасшы, батыр,
Ғаламға бүлік сала ма?
Қиратып, жойып,
Сындырып бақыт таба ма?
Адамның даңқын
Бүлдіргенімен емес, бірақ та,
Бітіргенімен ,
Бүтіндегенімен бағала.
Саралап көрсең,
Атақты сындырғыштардың ,
Жетпейді бірі,
Сынықшы сырттан данаға!
Сүйегі сынып,
Қаншама қор боп қалды адам,
Сүйеніш іздеп,
Келгенді қарсы алды ағам,
Жігері құм боп,
Күдерін үзген жандардың,
Жілігін майлап,
Үмітін қайта жалғаған,
Баса алмай аяқ,
Қадам жер арман болғандар
Шипасын берсе,
Құстай боп ұшып заулаған,
Нұрлы жан Нұрлан,
Сынықшылардың сырттаны,
Өмірін еңбек,
Ізгілік жолға арнаған!
Еңбегің үлкен,
Есептеп, көңіл бөлсеңіз,
Жетпіс – жемісің,
Өмірді оймен өлшеңіз,
Қисық аяқты
Түзету қолдан келгенмен,
Теріс пиғылды,
Түзету қиын, сенсеңіз.
Болардай ғажап,
Жаңалық үлкен ғылымда,
Бір қызық сынақ,
Сыныққа жасап көрсеңіз,
Қыңыр мойынды,
Бір бұрап жөнге келтіріп,
Ұрының қолын
Ұрламайтын ғып берсеңіз!
Бабаның жолын жалғасын балдар,
Ата боп бата беріңіз,
Өркендеп, өсіп,
Өмірдің гүлін теріңіз,
Көктемдей күлген,
Гүл мен нәр берген,
Гүлнәрмен бірге нұрланып,
Аман-сау жасап,
Аяңдап жүзге келіңіз!

---